Jfhr

خمـــــــــــــ رنـــــــــــــات ــــــــــس

  • اعزائي اهل الخير الكرام بقالى كتير قوى متكلمتش مع حضراتكم كلام من القلب زي ما اتعودت معاكم انى اكتب و اقول بعفوية و انتم دايماً كنتوا بتستحملونى
    الحقيقه انا صحيت الصبح النهارده على خبر حزين

    كان بقالى فترة بسيطة بقفل موبايلى بالليل او بعد صلاة الفجر على حسب موعد نومي يعني و افتحه و انا نازله العمل و النهارده لاقيت رسالة تفيد ان في " 5 رنات من سيدة فاضله " اسمها مدام فوزيه

    انا اعرفها كويس بس " 5 رنات " ؟؟؟ قلت اكيد الأمر ضروري فإتصلت بيها انا كمان كنت ف العاده اقصي مرات الح فيها بالإتصال على حد هي مرتين تلاته في الطوارئ

    بس المرة دي فوجئت بنفسي برن عليها انا كمان تقريباً 5 مرات إصرار انها ترد

    " البقاء لله "

    و رد عليّا رجل تصورت انه حيقول النمرة غلط فوجئت بيه زوج بنتها بيقول لي

    لم اتمالك اعصابى او دموعي و لا صدمتى من الخبر

    كيف ..متى ..لماذا ؟؟؟!!!! تساؤلات كثيرة خطرت لى

    قال لى انها اصيبت بحادث على الطريق الساعة 7 الصبح و هي عائدة لبيتها

    كنت قد اتصلت بها امس و كلمتها و اتفقنا ان يحدث بيننا اتصال اليوم عندما تعود لبيتها كانت عند اخوها بحلوان و بيتها كان فوق احد الجمعيات الخيريه التى اتعامل معها

    مدام فوزية كانت انسانه مكافحه جداً و مجتهده جداً من ساعة ما زوجها توفي بعد رحلة طويلة مع التعب

    و هي كانت من الأسر المتعففه اللى كتير كلمت حضراتكم عليهم ..و رغم انها ما شاء الله عليها مربية اولادها احسن تربية و بتحاول تظهر بأقل القليل بأحسن مستوي اللا انها كان الدعم الألهى من عطاء الله بيفرق معاها

    كتير و هذا هو ما كان بينها و بين الله ثم بينها و بين من عرفوا بظروفها من المحيطين

    بمعنى انه وقوف حضراتكم بجوارها كان بيدعمها دعم حقيقي لتستمر في العطاء لأسرتها و يستمر ستر الله عليها

    انا مش عارفة اقول ايه انا حاسة ان اللى قدمته ليها ف حياتها كان قليل قوى على احتياجاتها بس غصب عنى و الله على اد ما كنت بقدر

    و ضميري مأنبنى كتير و ببكى من ساعة ما سمعت الخبر لأنى كنت قافله موبايلى يمكن كانت بتستنجد بيّا ؟؟؟ يمكن كانوا محتاجين لها نقل دم ؟؟ يمكن كانت عايزة اسعاف ؟؟ معرفش

    اتصلت بكل اعضاء الجمعيه اللى عرفونى بيها ملاقيتش عندهم خبر و ملاقيتهاش رنت عليهم

    كانت بترن عليّا انا بس ..اكيد كانت حاسة انى اقدر اساعدها باى حاجه ..اللهم لا اعتراض انا مش عارفه انا ليه قفلت موبايلى امس ..اللهم لا اعتراض ...إنا لله وإنا اليه لراجعون

    انا بجد مش عارفه اقول ايه بس و الله لولا انى كنت مريضة اليومين اللى فاتو مكنتش عملت كده ..مكنتش قفلته ..يمكن مكنتش حقدر اساعدها بس انا مش عارفة كانت محتاجه ايه منى

    هو قدر الله بس الموضوع صعب قوى ..قوى قوي

    ربنا يرحمها يا رب و لو كانت الأرواح بتحس بينا ارجو من الله ان تسامحيني يا مدام فوزيه ..سامحيني على عدم رؤيتي لإتصالك اللا بعد فوات الأوان

    سامحيني على اى حاجه اكون قصرت في حقك فيها

    كانت لسه بتعزمنى على فرح بنتها اللى كان حيبقى بعد شهور كانت فرحانه و هي بتعزمنى و فضلت تدعي لى كتير و تسال عني كتير و افتكرت بابى الله يرحمه و انا بكلمها و قعدت ابكى على كتفها جامد .
    كانت اول مرة مع انى اعرفها من 5 سنوات ..اول مرة الاقيها تاخدنى في حضنها و بكيت و هي كمان بكت

    انا اسفة انى بقول لحضراتكم حاجات يمكن متفرقش معاكم

    بس انا عايزة اختم كلامى معاكم بالدعاء ليها ..لو كانت توفت ف الحادث اكيد هي شهيدة ان شاء الله بس رجاء حضراتكم تدعوا لها بالرحمه و الجنه و انها تلاقي عند ربنا اللى معرفناش احنا البنى ادمين نعمله ليها ف الدنيا ..و ارجو ان يكون هذا هو اكبر شئ اقدر اقدمه ليها و اخر حاجه اقدر اقدمها ليها

    شكراً

    اختكم / منار عقل

  • Facebook Twitter Google+


© Copyright 2015 Algazaly association powered by TD.COM.EG