دعوني وشأني

• السلام عليكم و رحمة الله و بركاته 
   
  من شوية سنين ...و في يوم من ذات الأيام عرفت بالقدر ان زميل فاضل " خطب " على خير و لم يبلغنا بهذا الخبر السعيد
   
  و رغم انها كانت اول مرة تحصل لى في حياتى و انا اللى كان بيتشرف بإبلاغي بمناسباتهم السعيده القريب و الغريب
   
  و رغم اننا كنا بنعتبره اخ صغير حقيقي لينا
  اللا انى لم اتضايق و لم اتصل بيه لأعاتبه بعشم ...بل لم انشر الخبر بين الآخرين يعني و لا كأنى عرفت ...لم افعل اى شئ على الإطلاق الحقيقه :)  غير انى تمنيت له بيني و بين نفسي الخير و السعادة
   
   
  ثم مرت الأيام و بدأت تتكرر الظاهرة مرات و مرات بيني و بين صديقات و زملاء و اقارب في مناسبات متنوعه
   
   الظاهر انه كان اول قطرة ف الغيث :)
  و اللا شكلها طلعت موضه من ساعتها :)
   
  المهم انى ...مرة اعرف ان واحده تزوجت ....مرة اعرف ان واحده انجبت ....مرة اعرف ان واحد كتب كتابه ....و اللى اشتغلت و اللى اتخرج ...و اللى سافرت و اللى و اللى ...الخ  
   
  ده حتى وصلت لدرجة ان مرة نزلت من بيت واحده قريبتى كنت " بقدم لها خدمه ما " و بعد نزولى بساعة واحده شرفها عريس بنتها بالزيارة عشان يقرأ الفاتحه :)
   و برده لم يبلغنى احد
   
  و كان الأمر عادي خالص و الله :) بالنسبة لى انا لوحدي على الأقل
   
   
  صحيح كانت زعله كبيرة في وقتها من اطراف كتير لأطراف كتير بس الحمد لله انا مكنتش مع اى طرف من دول :)  
  الحمد لله على نعمة العقل :)
   
  الغريب ف الأمر ان الناس اللى كانت بتعمل العمله دي :) كانت " بتقاطعنى" بعدها و كأنهم مش متصورين انه ممكن تفضل علاقتنا طيبه بعد العمله اللطيفه دي :) منهم انهم ميقولوليش يعني 
   
  مع انى انا شخصياً كنت على اتم استعداد في كل مرة انى استمر في علاقتى بيهم عادي جداً
  و ذلك لإيمانى ان دي حرية شخصيه و ان كل واحد حر يبلغ اللى هو عايزه للناس اللى هو عايزهم طبيعي جداً
   
  كمان كنت مؤمنه ان محدش يعرف ف النهاية ظروف حد ....عشان كده لازم نلغى الثوابت الرتيبه اللى كبرنا عليها ..لازم نحرر عقولنا من تخلف التقليد الأعمى
   
  كنت مؤمنه ان في حاجات مهمه قوى ممكن الناس تعملها مع بعض و تكون قوية فيها كمجموعه
  الحاجات دي اكبر و اهم من الخصوصيات و الخلافات الشخصيه ...بسيطه كانت او معقده
   
                                        انا ليه بقول الكلام ده دلوقتي ؟؟؟؟؟؟؟!!!!!؟؟؟؟؟؟!!!
   
  ...لأنه مرت الأيام و السنين و لاقيت نفسي شبه الناس و بعمل زي الناس ف مواقف خاصه بتمر في حياتى
   
  و مش بقدر ابلغها لكل الناس
   
  مش عشان انا غاوية اخبى او خايفه من حسدهم لا سمح الله كما يعتقد البعض للأسف ..و لكن لأن بعضها كان حزيناً و انا اكتشفت ان الفرحه سهل تتقسم على الجميع ..انما الحزن صعب كتير تقسمه غير مع اللى بتثق فيهم من اقرب المقربين  
   
  ساعات كتير مبتقدرش تتكلم فيه مع حد خالص
   
  يعني اكتشفت انه سهل جداً و حاجه حلوة قوى انك تقول انا " نجحت"  للكل و تتلقى التهانى من الكل
   لكن صعب جداً تبلغ الكل انك " سقطت " رسبت يعني صعب قوى ناس كتير تواسيك و تقدر تتحمل ده .....و هكذا
   
  كمان لاقيت نفسي بعمل هذا في " امور " حسيت انها مليئه بالتفاصيل الخاصه جداً اللى لو اعلنت عنها حضطر اتكلم ف التفاصيل دي و مينفعش اتكلم فيها باى حال من الأحوال
   
  و مرة تالته لاقيتني بعمل كده في امور تخصنى ايوة بس متخصنيش بشكل شخصي و لكنها متعلقه بأحد افراد اسرتى او عائلتى و مش من حقي انى اخلى حياته مشاع للكل
   
  و مرة رابعة و مرة خامسه ..تنوعت الأسباب و لكنها جميعاً كانت اسباب مشروعة و بيني و بين نفسي كنت واثقه انى مبعملش حاجه غير اللى من حقي انى اعمله
   
  و لكنى فقط حاولت اختلف عن اللى سبقونى في الأفعال دي 
   
  و هي انى ابقى على علاقتى و صداقتى و اخوتى و قرابتى قائمة بكل هؤلاء الذين حالت الأقدار بينى و بينهم في قدرتى على ابلاغهم بجميع اموري
   
  و لكن :)
  و لكن :) 
  و لكن :)
   
  حدث ما هو كان لازم يحدث ..مش فاهمه ليه برده كان لازم يحدث
   
  المفاجئه بقى  .....هم اللى قاطعونى لمَا عرفوا بأخبار تخصنى مكنتش حكيت لهم عنها و في منهم اللى عاتبنى بشدة
   
  إزاى و إزاى تخبى ..و الجميع الحقيقه اجتمعوا على تصرف واحد و هو انهم مشيوا ينشروا اخباري لكل الناس كنوع من انواع الإنتقام منى :)
   
  حاجه كده عامله زي ..."انتى بتخبى عننا " ..طيييييييب :)))
   
  و اللى اتمنى لى الشر و اللى اتمنى لى الحسد و اللى و اللى :) 
   
  كل المشاعر اللطيفه دي بقى صدرت من ناس المفروض انى لم اؤذيهم في حياتى و لا مرة .. ووقفت معاهم في كل ازماتهم وقفة " رجالة " :) 
   
  و كعادتى لم اتمنى لهم او لغيرهم اللا كل خير و سعادة :)
   
  المواقف الإنسانية الجميلة دي الحقيقه خليتنى اكتشف حاجه مهمه قوى هو ان اللى " مقالوليش " كانوا ينفعوا قوى يبقوا اصدقاء مع اللى انا مقولتلهومش "  :)))))
   
  الإتنين ردود افعالهم شبه بعضها
   
  و الحاجه الغريبة الوحيده الغير منطقية اللى كانت ف النصف هي
   
   انا :)
   
  انا الوحيدة اللى كنت مستعدة استمر في صداقتى و اخوتى و قرابتى و عشمي و كامل علاقتى الطيبه مع ناس مبيقلوليش كل حاجه عنهم ...و ناس انا مش مجبرة اقول لهم كل حاجه عني :)
   
  كنت و مازلت شايفه الأمر " ارقي " من انك تفضح حد او انك تقاطع حد عشان موقف هو و لا حاجه اصلاً
   
  بس لأنى اكتشفت ان اللى انا شايفاه ده غريب حبتين في مجتمعاتنا الشرقية :) لأن الناس هنا بتموت ف الخصام :)) بيحبوه زي عنيهم و بيتلككوا لبعض على غلطه عشان يقطعوا كل حاجه ف لحظه 
   
  قررت اكتب ف الموضوع عشان افكر الناس بجملة " التمس لأخيك 70 عذراً " و بكلمة الخليفة " معاوية ابن ابى سفيان لو ان بيني و بين الناس شعرة ما قطعتها ان شدوا ارخيت و ان ارخوا شددت " 
   
  قررت اكتب عشان اقول للناس محدش يعرف ظروف حد و محدش يعرف بيت جاره اللى وجهه في وجهه مقفول على ايه 
   
  قررت اكتب عشان اقول للناس الدنيا مش مستاهله نؤذي بعض بالشكل ده 
   
  قررت اكتب عشان اقول للناس نفسي رقي الأخلاق هو بس اللى يجمعنا 
   
  قررت اكتب عشان اقول لكم كلكم انى رغم كل شئ حفضل اتمنى لكم جميعاً من عرفت و من لم اعرف و من كنت اعرف كل خير و سعادة :) 
   
  و حتى التقي بكم في وقفة تأمليه لأخرى لحاجات عايشه وسطنا و احنا مش واخدين بالنا منها 
   
  اتمنى اجمل حاجه ف الوجود لجميع المخلوقات و جميع الدول من ضمنهم مصر و المصريين :)
   
  شكراً 
  اختكم / منار ممدوح عقل 
   

  اللهم اجعلنى خيراً مما يظنون و اغفر لى ما لا يعلمون و ارحمنى يوم يبعثون