عدد شهر2018/9

بين القديم والجديد .. تتجدد خطوات الخير .. حيث بدأنا 2008

  • التاريخ : 2016-01-08

  • (يوميات الغزالي)

    قافلة الغزالي الأولي في القليوبية

     

    لا اعرف كيف أبدا أو أصور ما رأيت في هذا اليوم، قد إيه إحنا مغمورين في نعم ربنا، وللأسف مش حاسين بيها، وده عشان ما شوفناش غيرنا اللي اقل مننا

    اليوم الجمعة 2 رمضان قامت جمعية الغزالي بقافلة لمحافظة القليوبية، زى ماوعدناكم في رمضان, حضرنا ليها 300 شنطة للناس الغلابة , طبعا قبليها عملنا بحث عن الأسر الفقيرة جدا في المنطقة، وكان اليوم توزيع الشنط

    لكم أن تتخيلوا عند وصولنا للمنطقة اللي وزعنا فيها, بصينا لقينا كوم من البشر اتلموا حوالينا وهجموا علينا, منهم العجوزة قوى ومنهم اللي معاها طفل وطفلين ومنهم الرجال, بقينا مش عارفين نعمل ايه, بقينا نحاول نجمعهم صفوف نلاقى الصفوف تتهدم ويجى ناس تانيين, نحاول نمشى على أساس الكشف اللي معانا وعلى قد ما قدرنا وزعنا الشنط على الأسر, ولكن للأسف تبقى كثير من البشر لم يحصلوا على الشنط, المشكلة انك تلاقى واحدة تيجى تتحايل عليك إن أولادها جعانين وظروفهم صعبة، لكن للأسف مش بأديك تساعدها, والستات العواجيز اللي يبكوا وعايزين شنط، واللي يلف ويأخذ شنطة تانية ، إحنا كنا مجموعة عددنا 13 فرد الحمد لله كنا حاكمين الأمر, لكن كنت انظر ليهم  وأقول حقيقي  يا عيني من غلبهم وجعهم

    ما اقدرش غير أقول غير الحمد لله واشكر ربنا على نعمتة العظيمة اللي كلنا مش حاسين بيها, اه لو تشوفوا المرضى والمحتاجين والناس اللي شفناهم وغيرهم وغيرهم كل واحد بقصة وحكاية ومأساة

    يا رب يخفف عنهم يا رب وأطعمهم وارزقهم يا رب المستضعفين والمساكين

    وان شاء الله إحنا الجمعة القادمة هنطلع قافلة تانية للفيوم, لو حد يحب يساعد فيها يكلمنا أو يجى الجمعية أو لو حد يحب يجى معانا يساعدنا في القافلة إحنا بنرحب بيه أو اللي يحب يجيب شنط وعايز يوزعها بنفسه برضه نرحب بيه

    ويا رب أكرم كل فرد ساعد في هذه القافلة وادخل الفرحة والسعادة على قلوبهم يا رب أصلح حالهم وأدخلهم جنتك وتقبل منهم هذا العمل الصالح

    يا رب خفف الآلام على كل مريض يا رب قوينا على مساعدة الفقراء والغلابة والمساكين والحمد لله على نعمتك يا رب

     

    صفاء قطب

    مديرة جمعية الغزالي- فرع مصر الجديدة

     

  • Facebook Twitter Google+


© Copyright 2015 Algazaly association powered by TD.COM.EG